Boru Batak Harus Baca, Poda Ni Dainang Taringot Tu Namar Parumaen

BATAKTIVE.COM -  Marimbar do suratan dibagasan minggu on, ala tung massai godang do na haboratan disuratan na parjolo taringot “inang simat...

BATAKTIVE.COM - Marimbar do suratan dibagasan minggu on, ala tung massai godang do na haboratan disuratan na parjolo taringot “inang simatua”, tung godang do tutu angka “parumaen” na mangiburu, ai boasa holan tu angka parumaen dibahen poda, ai dos do nakkok dohot tuat na, molo so denggan simatua, boha do bahenon ni parumaen marparange na denggan?

Nian ndang pola ganjang patorangon, dia do alana? jala boha do tutu partonding na? goar na pe Poda, hata na adong ido sipeopon, unang sai dirajumi angka na asing. martingki do sude angka pambahenan.

Img Source : http://rosenmanmanihuruk.blogspot.co.id

Ditikki na mangarimangi angka pandohan ni panukkuni, nisangahon do laho tu porlak ni sada natua tua, laho manungkun aha do tutu naporlu sidohonon tu angka “simatua” tu parumaen na, laho mangadopi parngoluon na. jala ditariashon ibana ma poda on, laho sipeopon ni angka “simatua”.

Alai tu hamu angka parumaen, paula so jaha hamu ma poda on, ai molo habotoan do on tu hamu, olo ma tutu gabe patinggilhu sipareon mu, jala martamba tamba angka pangidoan mu. alai nang pe songoni, rap ta peop ma hata i. alai peop hamu ma bagas paima ro partingkian na gabe “simatua” hamu marsogot haduan.

Tu hamu angka natua tua naung marparumaen, godang do angka poda naung binege muna sian angka jolma naung parjolo marparumaen, na sai mangholsohon angka pangalaho ni parumaen na. godang do rumang ni pangalaho di saluhut jolma, sipata na denggan di diri niba sandiri ndang ingkon sarupa dos tu jolma na asing.

Alai ringkot do poda on gabe sada ondolan/hundulan laho mangaradoti dohot mambahen na denggan tu parumaen nang dohot keluarga na. on ma panuturion naung dihalashon angka jolma tarumobi na mangarodi hadengganon ni parsaripeon ni ianakkon na.

Naparjolo, Unang ma sai mampartahanhon pandapot mu sandiri na mandok ingkon rap sajabu ma hamu dohot inakkon mu dohot parumaen molo dung marruma tangga. Nang pe nasida boi holan manewa newa inganan nagelleng, saguru tu nasida do na naeng bahenon ni nasida tu parruma tangga on na.

Songon hau na rimbun doi, molo jonok sai marsiososan, alai molo dao ibana sai gok do sihol naeng marsitomuan.

Pai dua,  Unang ma dirippu manang diarop roha mu parumaen mi sarupa songon borum sandiri, alai ingot ma ibana songon siadosan ni anak mu.

Tung pe dirippu roham anak mi na so matobang dope laho mangurus diri na sandiri, alai pasangap ma parumaen mi, sai hira dos dohot dirim naung marhasohotan, na boi mambahen na denggan tu dirina sandiri dohot siadopan na, nasa jolma naung marhasohotan ingkon porlu do parsangapan.

Ingot ma!, sangkababa hata na pilit pe haruar sian ho maradophon parumaen mi, sai na ingoton na doi saleleng tolap parningotan na jala boi sahat ujung ni ngolu na.

Jala porlu do parate atehonon mu sipasingot on. molo dipingkiran na, ai holan inong na sandiri do na boi mandok hata tu ibana, alai molo ho ndang boi, tung nasa tolap mu doi.

Patoluhon, molo tung pe parumaen mi lomo roha na manuhor angka barang barang na menurut ho na so marguna, giat manonton film, manang sai holan na maniop niop HP dijolom, ndang olo manussi pahean jala mangalompa, manang ndang mangantoi haiason, ndang urusan mu i.

Ingkon tanompononmu do pandohan on, paloas ma nasida laho mangurus diri na sandiri, alana di naso pamotoan mu, sai na pasingoton ni anak mi doi, songon naung niajarhon mu tu ibana sian siatehon na. Saonari nungnga magodang jala matobang anak mi laho pasingot siadopan na.

Pai opat, Molo tung pe na mar-ikkon tinggal hamu di sada jabu, parsangapi ibana, unang jama jama tu barang nasida.

Unang manussi pahean nasida, jala unang mangaloppa laho sipanganon ni nasida. Unang ma sahali sahali mangarigopi manang mangarorot pahompum molo so dipangido nasida laho mangido pangurupion. Sai ingot ma, padiar ma nasida laho mangaradoti na ringkot didiri nasida, ai holong na maralang alang do molo sai radotan mu dope parruma tangga on ni nasida.

Lima, Molo sanga diida ho nasida marbada, paula so bege/boto ma partontangan nai, boha do dihilala ho, ditingki baru marruma tangga naujui? molo martongkar ho dohot siadopan mu, lomo do roham diantoi manang diradoti na asing? tarlumobi mai simatua.

Jadi molo sipangantoi do ho dipartontangan ni nasida, sada hailaan bolon doi tu parumaen mi. molo marungut ungut anak mi tu pangalaho ni parumaen mi, denggan pasingot ibana, jala patudu angka na denggan naung binahen ni parumaen mi.

Suang songoni do molo parumaen mi mangalu alu alani pangalahoni siadosan na/anak mi, pasingot ma anak mi.

Onom, Natua tua ni pahompum do anak dohot parumaen mi, ndang hamu! Nang pe sai jonok pahompumi diabingan mu, jala didok jolma do hatuaon ni ompung do pahompuna, alai gabe baliksa do panghirimon, molo sai diradot radot ho pahompumi molo so pamotoan ni parumaen mi.

Paloas ma pahompumi diradoti among dohot inong na, jala unang takko holong ni among/inong na sian anak na. tung pe ndang suman dibereng ho pangalaho ni pahompum tu among/inong na, ndang urusan mu i.

Papituhon, Parumaen ndang na mar ikkon mambahen na denggan tu ho, alai molo anakmu ndang mambahen na denggan tu ho ido sipinsangon mu. Guruhon ma tu anak mi asa gabe uluan na matobang dibagas keluarga na, nang dohot maradophon ho.

Tung pe jotjot angka na denggan dibahen ho tu parumaen mi sai unang mai paingot ingot. Alai bilangi ma angka hata naung marsalpuan sian ho maradophon parumaen mu.

Pai walu, Molo tung pe anakmi dohot parumaen mu naeng mangaradoti parsirangan na marhite pengadilan, unang adopi. Ai tarbarita do ho haduan gabe natua tua mangaradoti na mambahen sirang tu anak na. Jala ndang inganan mu nasida laho mangadopi partontangan ni nasida, alai paima ma partikkian laho mambege aha do parbue na dapot nasida.

Sia, Sai sakkapi ma parngoluon mu naung dibagasan hatuaon, naung suda gogo, unang ma sai mangarophon pangurupion sian ianakkonmu, nasa jolma na sai mangarophon pangurupion sian ianakkon na, sai partontangan do ujung na.

Godang dope angka naimbaru naboi siradotan mu laho manguduti parngoluon mu. ho sandiri do mambahen haputusan tu sandok parngoluon mu sonang manang susah.

Molo tung boi, pahabis nasa tolapmu angka arta naung sinarim saleleng ngolum, unang tadikkon tu ianakkon mu. Ai godang do angka jolma arta na nagabe patubu bada tu ianakkon na.

Sampulu, Ia pahompu mi ndang arta i di ho, alai hatuaon mu doi marhite anak dohot parumaen mu, unang ma dibahen ho gabe sidalian mu i laho pasonang sonang dirim.

Na pangujungi, ondolhonon ma poda on tarlumobi tu simatua borua, dang adong na manjua ia anakmi natinubuhon mu mardongan durus ni mudar mu, jala naung dipasingkolahon ho sian nasa gogom, molo tung pe adong na so lomo ni roham maradophon parrumatangga on na, tung na so suman doi tariashonon mu manang tu ise pe taho, holan asa sude pangidoan mu dioloi.

Alai asa unang marisuang gogo mi na sailaon martangiang ma ho asa dibagasan haserepon nasida mangula siulaon na, jala pantun maradophon natua tua na, songon natoras na naung boi tolhas manadalani portibion nasai maemehon angka na denggan tu angka gelleng na.

Botima

Oleh Much Simanjuntak

Dikutip dari Facebook's Post Poda Nauli

Tanggal 14 Februari 2016